«Астана LRT» ЖШС бұрынғы басшысы Талғат Ардан халықаралық іздеуге жарияланды, деп хабарлайды Neonomad.kz аталмыш компанияның қазіргі бастығы Бекмырза Игенбердиевке сілтеме жасап.
“Сыбайлас жемқорлыққа қарсы Агенттіктің тергеу амалдарымен «Астана LRT» серіктестігінің бұрынғы төрағасына қатысты қылмыстық іс қозғалды. Қамауға алыну туралы өтініш жіберілді. Сот сырттай шешім қабылдады, ол халықаралық іздестіруге жарияланды. Қазір интерпол бұл мәселемен жұмыс істеуде»,- деді Игенбердинов.
Бұған дейін Талғат Арданға қатысты «билігін асыра пайдалану» бойынша сотқа дейінгі тергеу шаралары жүргізіліп жатқаны айтылған болатын.
«Оның жұмысы қаншалықты тиімді әрі ашық түрде жүзеге асқанын білу үшін бұрынғы жұмысындағы барлық жобаларды тексердік. Кейбір құжаттар тіпті жоқ, ал кейбіреулері болса дұрыс рәсімделмеген. Жауапты органдар ақ-қарасына жетеді деп сенемін»,- деді Бекмырза Игенбердиев.
Компанияның қазіргі басшысы айтып тұрған құжаттар 2014 жылы рәсімделген, ол кезде «Астана LRT» серіктестігіне Талғат Ардан басшылық еткен болатын. Ол 2017 жылы қызметінен босатылды.
