Арыста болған жарылысқа байланысты қаланың жақын маңында орналасқан елді мекендерге де 100 мың теңгеден өтемақы төленетін болды, деп хабарлайды Neonomad.kz Түркістан облысы әкімдігінің баспасөз қызметіне сілтем жасап. 

Баспасөз қызметінің таратқан ақпаратынша, төтенше жағдайдан соң қалаға көрші елді мекен тұрғындарынан сұрақтар келіп түскен.

«Арыс қаласындағы төтенше жағдайға байланысты 100 мың теңге өтемақы беру бойынша түрлі сауалдар туындауда. Көрші елді мекен тұрғындарынан сұрақтар келіп түсуде. Алайда ҚР Үкіметі бекіткен тізім бойынша өтемақы беріледі. Атап айтқанда, Арыс қаласы бойынша – 44 994 адам, Ақдала ауыл округінде – 4 324 адам, Қожатоғай ауыл округі бойынша – 4 232 адам, Дермене ауыл округінде – 2 052 адам», – дейді баспасөз қызметі.

Бірінші кезекте 55 602 тұрғын 100 мың теңгеден алады. Бұл өтемақының жалпы соммасы 5,6 миллиард теңге болып тұр.

«Өтемақы төлеуге ҚР Үкіметінің резерві есебінен 3 миллиард теңге, облыстық бюджеттен 1 млрд. теңге және арнайы құрылған «Түркістан» әлеуметтік қорына түскен қаржыдан 1,6 миллиард теңге бөлінеді деп күтіледі. Жергілікті тұрғындардан құжаттарды қысқамерзімде жинауға Арыс қаласындағы 17 секторда бекітілген тиісті мамандар және аудан, қала әкімдіктерінің қызметкерлері жұмылдырыған. Олар 2019 жылдың 3 шілдесінен бастап өтемақы алуға өтініштер жинақталып жатыр»- делінген.

Еске сала кетсек, 24 мауысда Түркістан облысының Арыс қаласында орналасқан әскери бөлімше жарылып, қала тұрғындары жаппай эвакуацияланған болатын.

Осы төтенше жағдайға байланысты бүгін, 15 шілдеде, елордада өткен Үкімет отырысында президент басқолбасшы ретінде Қорғаныс министрлігіндегі істерге қанағаттанбайтынын айтып, министрге сөгіс жариялаған болатын.