Түркістан облысының әкімі Өмірзақ Шөкеевтің мәліметінше, Арыс қаласында болып жатқан жаралыстардың салдарынан бір адам қаза болды, деп хабарлайды Neonomad.kz        

«Жарақат алған 31 адам ауруханаға жеткізілді. Екеуінің жағдайы ауыр, қалғандары болса қанағаттандырарлы. Бір адам көз жұмды. Оның машинасына снаряд түсіп, жарылды», – деді облыс әкімі.

Оның сөзінше, қала тұрғындарын эвакуациялау жұмысы аяқталып қалды.

«Біз әр сағат сайын қаланы аралып шығудамыз. Қазір қалада ешкім қалмады деп айтуға болады. Жертөлелерде тығылып отырған адамдар болуы мүмкін, бірақ біз, патрульді әскерилер, полиция қызметкерлері, сағат сайын барлық жерді аралап шығудамыз. Қалып қойған адамдары қауіпсіз жерге алып кетіп жатырмыз. Осы шешіміз дұрыс деп ойлаймын», – деді Өмірзақ Шөкеев.

Әкімнің сөзінше, эвакуация кезінде адасып қалған кішкентай балалардың ата-анасы іздестірілуде.

«Соңғы сағаттың ішінде 1616 адам эвакуацияланған. Ата-аналарын таппай қалған балалар бар. Ауданда, Шымкентте табылған балалардың суреттері Түркістан облысы әкімдігінің ресми сайтында жарияланатын болады. Бірақ бір-бірін тапқан жағдайлар кездесуде», – деді Шөкеев.

Оқыс оқиға бүгін, 24 маусымда, Түркістан облысы Арыс қаласында болды. Таңғы сағат 09.20 өткенде жергілікті өртке қарсы қызметінің пультіне әскери бөлімнің қоймасында жарылыс, сосын өрт шыққаны жайлы ақпарат келіп түскен. Оқиға орнына арнайы қызметі жұмылдырылған. Қаладан тұрғындарды эвакуацияланды. Жарылыстан жарақат алғандар бар.