Өткен жылы шетел азаматымен қолұстасқан қазақ қызын көшеде кетіп бара жатқан жерінен ұстап алып масқаралаған Жәнібек Иманмәзір нәзік жандыларды өзге ұлт өкілдерінен қорғағысы келетінін айтты, деп хабарлайды Neonomad.kz ақпарат агенттігі Stan.kz сайтының эксклюзивті сұхбатына сілтеме жасап.

Белсенді желі қолданушысы Жәнібек Иманмәзір соңғы уақытта қазақ қыздарының арын сатуға бейім болып кеткенін айтты.

«Қыздарымызды бағаламай жатқан жігіттер де бар. Арын сатқыш қыздарымыз күн санап көбейіп жатыр. Маған көбісі «Көпке топырақ шашпа» деп ескерту жасайды. Біле білсеңіз, арын сатқыш қыздан елін сатқыш бала туады. Қазақ жігіттері қыздарды бей-жай жіберіп қойды. Осының салдарынан қазір ер азаматқа қарсы сөйлейтін қыздар көбейді. Бұрын ер азамат сөйлесе, әйел тыныш қана отыратын. Ата-бабамыздан «Еркек үндемей, қатын сөйлеген үйден без» деген сөз қалған», – дейді желі белсендісі.

Әрі қарай ол аталған сұхбатта адам есімінің тағдырына міндетті түрде әсер ететінін айтқан. Сондай-ақ, өзінің турашыл мінезі туралы да сөз қозғаған.

«Адам есімінің тағдырына әсер ететіні сөзсіз. Бұл ғылымда дәлелденген дүние. Қазақ қоғамында осындай есімді атақты, белсенді кісілер бар ма? Жоқ. Жүз Айканың ішінде біреуі ғана дұрыс болар. Осылай айтқаным үшін жұрт «Бес саусақ бірдей емес» деп менімен дауласып жатыр. Бірақ, бұл – шын. Мен шындықты жасырмаймын, бетке былш еткізіп айтамын», – деп қорытты сөзін ол.