Алматы облысының Шамалған станциясында пойыз бен автобустың соқтығысуынан ауыр жағдайда ауруханаға түскен үш адамның беті бері қарады, деп хабарлайды Neonomad.kz ақпарат агенттігі ҚазАқпарат сайтына сілтеме жасап.
«5 жасар баланың жағдайы ауыр. Дегенмен, күннен-күнге динамикасы жақсарып келеді, сөйлей алады, тамақ ішеді. 3 жастағы екінші қыз – комада. Дегенмен, жасанды тыныс алу аппаратынан ажыратылды. Қазір өздігінен демалады. №7 қалалық клиникалық ауруханада қос қыздың анасына ота жасалды. Жағдайы орташа, операция сәтті өтті, динамикасы жақсарды», – деп хабарлады Алматы қалалық Денсаулық сақтау басқармасынан.
Еске сала кетейік, 15 қыркүйекте Шымалған станциясында пойыз бен автобустың соқтығысқаны туралы жазған болатынбыз. Жол апаты салдарынан алдын ала дерек бойынша екі адам қайтыс болды, 9 адам зардап шеккен.
Ірі жол апатынан соң жергілікті тұрғындар шу шығарғанын жаздық. Олардың сөзінше, осы күнге дейін көп адамның пойыз басып көз жұмғанын айтып шу шығарды. Осы орайда олар көп жылдан бері көпір сұрап келе жатқанын жеткізді.
Сонымен қатар, оқиға орнында болған куәгерлердің сөздерінде жаздық. Олардың айтуынша, жүргізуші есікті ашып, адамдарды шығарған. Сол кезде оның әйелі «Шық!» деп айқайлады. Бірақ ол өзі үшін адамдар маңыздырақ екенін айтты.
