Алматы қаласында жас жігіт көлігіне жол бермей қойған ер адамның құлағының бір бөлігін жұлып алды, деп хабарлайды Neonomad.kz ақпарат агенттігі.
Аталған ақпарат Kris_p_brothers паблигінде жарияланды.
Суреттің тұсына оқиғаның Абай мен Саин көшелерінің қиылысында болғаны жазылған. Жәбірленуші айыпталушының көлігін өткізбей қойған. Айыпталушы оған қарсылық танытып, көлігінің жолын кескен. Кейін 22 жастағы жігіт көліктен түсіп, қарсыласын ұра бастайды. Содан кейін оның құлағының бір бөлігін тістеп жұлып алады.
Полиция департаменті ҚР ҚК 293 «бұзақылық» бабы бойыншы сотқа дейінгі тергеу амалдарының жүріп жатқанын айтты.
«Дәл қазір Әуезов аудандық полиция бөлімі оқиғаның мән-жайын және сол жердегі куәгерлерді табу үшін тиісті шараларды қолға алды», – деді министрліктің баспасөз қызметі.
Сондай-ақ, жәбірленушілердің алған жарақаттарының қаншалықты ауыр екені сот-медициналық тексерумен анықталмақ.
Егер күдіктінің кінәсі дәлелденсе, онда оған 5 мыңға дейін айлық есептік көрсеткіш көлемінде (12 625 000 теңге) айыппұл салынуы немесе бес жылға дейін бас бостандығынан айырылуы, не сол мерзімге бас бостандығы шектелуі мүмкін.
