2019 жылдың 4-5 тамызында Алматы қаласында триатлонан кәсіпқойлар мен әуесқойлар арасында алғаш рет «ASTC Asian Cup» халықаралық турнирі өтеді.
ASTC Аsian Cup – Азия триатлон конфедерациясы (ASTC) мен Халықаралық триатлон одағының (ITU) кубоктар сериясы. Бұл турнирге Elite категориясындағы барлық спортшылар қатыса алады.
«Біз 4 тамызда әлемнің 40-тан астам елінен 130 кәсіби спортшыны жинауды жоспарлап отырмыз. Бұл жарыс – Халықаралық триатлон одағымен өткізілетін және барлық әуесқой спортшылар қатыса алатын кубоктар топтамасы. Ал 5 тамызда AGE тобының жанкүйерлері арасында, яғни 18 жастан асқан спортшылар чемпионаты өтеді. Қатысуға ниетті әуесқой спортшылар чемпионаттың ресми сайты арқылы өтініш бере алады. Сондай-ақ, «Age Group» санатындағы қатысушыларға (гендерлік шектеулерсіз және жас айырмашылығына шектеу қойылмаған) командамен қатысуға рұқсат етіледі. Жасақталған команда екі немесе үш адамнан тұруы мүмкін. Алайда, жарыстың қатысушылар саны бойынша шектеу бар. Қатысушылар саны максималды 220 жеке атлеттен, ал командалық есепте 30-дан аспауы керек», – дейді Алматы триатлон федерациясының атқарушы директоры Руслан Когай.
ASTC Аsian Cup турнирінде кәсіпқойлар үшін қашықтық спринтті болады. Нақтырақ айтсақ, 750 м жүзу, 20 км велосипед және 5 км жүгіру, ал әуесқойлар үшін 1500 м жүзу, 40 км велосипед және 10 км жүгіру деп бекітілген. Әуесқой триатлон ережелерімен біріншіліктің ресми сайтынан танысуға болады. Турнирдің толық маршруты жарыс күніне жақын уақытта белгілі болады.
Айта кетсек, триатлон жүзу, велоспорт және жүгіру секілді спорттың үш түрінен тұрады. Қазақстанда бұл спорт түрі еліміздің барлық өңірінде дамып келеді. 2019 жылы республикалық және халықаралық деңгейдегі 18 жарыс өткізу жоспарланып отыр.
