ҚР Цифрлық даму, инновациялар және аэроғарыш өнеркәсібі министрі Асқар Жұмағалиев пен Алматы қаласының әкімі Бауыржан Байбек «ақылды қала» жобасын іске асыруда 5G желілерін қолданудың техникалық мүмкіндіктерімен танысты, Neonomad.kz хабарлайды.
Таныстырылым барысында ұйымдастырушылар ұялы және тіркелген сымсыз кеңжолақты технологиялардың мүмкіндіктерін көрсетті.
«Бесінші буын технологиясын енгізу «ақылды қалаларды» құру үшін маңызды, жаңа мүмкіндіктер ашады. Мысалы, трафикті басқару жүйелерін енгізгенде, ауа-райының жағдайын қадағалағанда және Smart city-дің көптеген элементтерін қосқанда, байланыстың жылдамдығын және сапасын арттырады. Біздің елімізде 5G технологиясын дамыту «Цифрлық Қазақстан» бағдарламасының жүзеге асырылуын жеделдететініне сенімдімін», – дейді Асқар Жұмағалиев.
Бұл орталық арнайы әзірленген функционалдық компоненттердің қызметін пайдалана отырып, бірнеше саланың даму деңгейін анықтауға мүмкіндік береді. Атап айтқанда, құрылыс, жол жөндеу, тұрғын үй-коммуналдық шаруашылық саласында, мектептердегі орын жетіспеушілігін жоюға көмектесетін талдау-сараптау жасауға мүмкіндік береді.
Министрдің айтуынша, жұмыс жасаудың бұл жүйесі цифрландыру және процестерді автоматтандырудың нақты экономикалық тиімділігін есептеуге, қаржылық шығынды стратегиялық жоспарлау мен таратуды тиімдірек жүргізуге жол ашады.
Айта кетсек, Алматыда қоғамдық көліктердегі электронды билет жүйесі, жол қозғалысы қауіпсіздігінің бейнемониторингі, қалалық автотұрақтардың «ақылды» жүйесі енгізілген. Қаланың кешенді көліктік реформасы 2018 жылы ақылды қалалардың еуропалық форумында ең үздік жоба деп танылған. Жоба негізінде цифрландыру кеңсесі құрылған, сондай-ақ алматылық және халықаралық кеңесшілермен бірге Smart Almaty тұжырымдамасы жасалып, 40-тан астам цифрлық жоба іске асырылған.
