Алматы облысында зауыт жарылып, салдарынан бір адам қаза тапты, деп хабарлайды Neonomad.kz ақпараттық агенттігі Tengrinews.kz сайтына сілтеме жасап.
31 тамыз күні сағат 12.00 кезінде Қарасай ауданы Райымбек ауылында газ-бетон блоктарын өндіретін цехта жарылыс болды.
Порталдың мәліметінше, жоғары қысымдағы газбетонды блоктарды өндіру барысында автоклав жарылып, кейін цехтың жарылып, ғимарат бүлінген.
Жарылыс болған жерден 1961 жылы туған ер адамның мәйіті табылды. Сондай-ақ, оқиға орнынан әр түрлі дене жарақатын алған үш адам аудандық ауруханаға жеткізілді.
БАҚ хабарынша, көз жұмған ер адам сол зауытта қызмет еткен екен. Облыстық әкімдік марқұмның отбасына көмек көрсетілетінін жеткізді.
«Облыс әкімінің тапсырмасымен зақымданған үйлер алдағы екі-үш күнде мекеменің ақшасына қалпына келтірілетін болады. Құбыр құлаған балабақшаның ауласы да жөнделеді» , – деді әкімдік өкілдері.
