Арыстықтар қала әкімдігінің алдына жиналып, өз наразылықтарын білдірді, деп хабарлайды Neonomad.kz Азаттық Радиосына сілтеме жасап. 

12 тамыз күні таңғы тоғыз кезінде арыстықтар әкімдіктің алдына жиналып, үкімет берген 100 мың теңгені әлі күнге дейін ала алмай отырғандарын, тіпті құжат тапсыра алмағандарын айтып шағымданды.

Бір қызығы, әкімдік алдына жинала бастаған жұртты полиция мен әкімдік қызметкерлері ғимарат алдындағы «Мәңгілік ел» саябағының қоршауынан шығармады. Әкімдікте Түркістан облысы әкімі Өмірзақ Шөкеев жиналыс өткізді.

Саябақ қоршауының ішінде қалғандар мұңымен бөлісті. Жарылыстан үйі зақымданған арыстық жөндеу сапасына көңілі толмайтынын айтты. Сосын мемлекет уәде берген 100 мыңды алу үшін құжат тапсыра алмай жүр екен. Шағымданған адам аты-жөнін айтудан бас тартқан. Оның сөзінше, құрылысшылардың ісі «сырты бүтін, іші түтін» дегенге келеді. Өйткені үйдің ішкі жұмыстарын шала жасаған.

«Қалғанын өзің жасап ал» дейді. Олай болмайды ғой. Далада жатырмыз. Балаларымның да оқуы жақындады. Не істейміз енді?» деді ол.

Бұны естіген әкімдік қызметі шағымданушының мекен-жайы бойынша жауапты сектор өкілін шақыртып, жауап алды. Кейін сектор өкілі әлгі адамды өзімен алып кетті.

Әкімдікке үйінің құрылысына көңілі толмайтындармен бірге 100 мың теңге көмекті алуға құжаты өтпей қалған жиырма шақты адам келді.

Олар бір реттік көмекті әлі күнге дейін ала алмай жүр. Әкімдіктің мәліметінше, тұрғылықты мекен-жайы бойынша тіркеуі жоқ тұрғындарға көмек ақша берілмеген.

Көмекті ала алмай қалғандардың нақты қайда тұратынын анықтау үшін өтініш жаздырып, мектеп, балабақша, жұмыс орнынан анықтама жинатып жатыр.

Облыс әкімдігі үкіметтен берілетін 100 мың теңге көмек 12 тамыздан бастап тұрғындардың банк картасына түсе бастайтынын хабарлаған.