Әкесін құтқарамын деп, жас жігіт кәріз суына батып өлді, деп хабарлайды Neonomad.kz Қарағанды ҚазАқпарат сайтына сілтеме жасап.
Қайғылы оқиға 16 шілдеде түнгі сағат 03.00 шамасында болған. Қарағанды қаласының Төтенше жағдайлар қызметінің мәліметінше, Бурабай көшесі бойында №92 тұрғын үйдің жанындағы кәріз суын жинауға және соруға арналған қосалқы станцияда ер адам құлап кеткені туралы хабарлама келіп түскен.
Белгілі болғандай, 59 жастағы Қарағанды тұрғыны кәріз құдығын тазалаймын деп, құдыққа түсіп кеткен. Оның тереңдгі 6 метр.
Ер адамды құтқаруға оның ұлы мен көршісі көмекке келген. Өздерінше шығара алмағандықтан, олар ТЖ қызметкерлерін шақырған. Сағат 04:53 және 05:02-де ТЖД күшімен үй иесі мен оның көршісі құтқарылып, медициналық мекемеге жатқызылды.
«Екі ер адам (1960 және 1989 жылдары туған) Х. Мақажанов атындағы облыстық травматология және ортопедия орталығының жансақтау бөліміне жатқызылды. Зардап шеккендердің жағдайы ауыр деп бағалануда», – деп хабарлады Қарағанды облысы денсаулық сақтау басқармасының баспасөз қызметі.
Өкінішке орай, әкесін құтқарамын деп құдыққа түскен оның ұлын аман алып қалу мүмкін болмаған. Сағат 06:30-да ТЖД және «Қарағанды Су» ЖШС күшімен 29 жастағы ер адамның денесі табылып, сыртқа шығарылды.
