Айжан Байзақова көп жыл бұрын қазақтың әшекейін ерекше сүйіп, онымен Ресей жерінде жүріп қалай мақтанғанын айтып берді, деп хабарлайды Neonomad.kz ақпарат агенттігі.

«Менің криминалды өткенім туралы қайсыларыңыз білген едіңіздер? Бір кездері мен актриса болуды армандап, анаммен бірге кастингілерге бардым, телехикаяларға түстім. Бірде мені Мәскеудегі киноға шақырды. Ол кезде кастинг жарты жылға жуық уақытқа созылды. Сол сәтте Қазақстанның танымал актрисалары да барған болатын. Бірақ Павел Чухрай режиссері болған «Сынақ» фильмінің басты рөліне мені таңдайды деген мүлдем ойға келмеді. Фильм Семейдегі ядролық сынақтар мен махаббат туралы», – деп жазды Айжан Байзақова.

Әрі қарай ол бір кездері мінезінің мүлдем басқа болғанын айтты. Тіпті, түсірілім тобының өзін танымай қалуы мүмкін екенін ескертті.

«Мен өте ұяң болдым. Мәскеуге келген кезде ұлттық бұйымдарымызбен мақтанып, үнемі шашыма шашбау тағып жүретінмін. Көше бойында сыңғырлатып жүріп, барлық төсектегі түсірілімдерден бас тарттым. Бірақ, өкінішке орай, жоба соңына дейін жетпеді. Бұл менің өмірімдегі кішігірім трагедия болды. Арманым орандалып, барша Қазақстанға танымал боламын деп қуандым. Алайда өмір маған танымалдылықтың басқа қырын әзірлеп тұр екен», – дейді бойжеткен.

Осы орайда, желі қолданушыларының пікірі екіге айырылды. Бірі оның бұрынғы образына ғашық болса, енді екіншілері бүгінгі қалпында ұнайтынын жарыса жазды.