Елді аралап жеке кештерін беріп жүрген танымал айтыскер ақындар – Балғынбек Имашев, Айнұр Тұрсынбаева, Сара Тоқамысова, Жандарбек Бұлғақов 13 мамыр күні Ақтөбе қаласына аялдаған.
«Жүрген жерімізде халыққа билет сатқандағы мақсатымыз – бір пайда табайық» деген ой емес. Түскен пайданы сол елдегі мұқтаж жандарға тапсырып келеміз. Талдықорғаннан бастап, пәтердің кілтін бердік. Ақшалай сыйладық. Бос жүрмей жас дарындарды, өнерпаздарды да қолдап жүрейік деген ниетіміз бар.
Біздің Ақтөбеден шыққан Димашымыз бүкіл әлемді шулатып жүр. Ақтөбе өңірінен әлі талай Ахмет Жұбановтар шығатынына күмәніміз жоқ. Бүгін сондай бір қайырымдылық шарасын жасағымыз келіп отыр.
Ахмет Жұбанов атындағы қазақ ұлттық аспаптар оркестірінің әртісі, төрт баланың әкесі Нұржан есімді бауырымызға қаржылай көмек көрсеткіміз келеді. Өзі қайырымдылық жолында жүрген жігіт. Үш баланы асырап алған», – деді айтыскер ақын Балғынбек Имашев ағынан жарылып.
