Алматыда қыздың өліміне кінәлі деген күдікпен пластикалық хирург қамауға алынды. Дмитрий Писарев бұған дейін бір әйелге ота жасап, өлтіріп алған болатын, деп хабарлайды Neonomad.kz ақпарат агенттігі КТК арнасына сілтеме жасап.

Сот кінәлі деп тапса да, сол жолы темір тордан тез құтылған дәрігер енді екінші адамның өліміне кінәлі деп айыпталып жатыр. «Эйр Астананың» бортсерігі Лаура Ізбасарова оған төсін тартқызғысы келген. Қыздың өлімінен соң, сот дәрігерді біржолата лицензиясынан айырған. Бірақ соған қарамастан, Писарев бүгінге дейін шымкенттік қыз-келіншектерге ота жасап келген.

Лаура Ізбасарова «Эйр Астананың» 6 тілде сөйлейтін ең белді бортқызметкері болған. Сұлу бойжеткен былтыр қазанда пластикалық ота кезінде көз жұмды. Содан бері анасының әділдік сұрап, бармаған жері жоқ.

«Ешнәрсе болған жоқ. Маған тергеуші де жоқ. Ешнәрсе деген жоқ. Яғни тергеу болған жоқ. Менің сұрайтыным, тек заңды түрде жазасын алсын. Ол қаншама адамның өмірін қияды. Маған ұқсаған аналар жылап қалмасын деп шырылдап жүрмін”, – дейді марқұмның анасы Дамира Алдамжарова.

«Эйр Астана» бортсерігінің өлімінен соң сот атышулы хирургті лицензиясынан айырған. Әрі тергеу аяқталғанша қаладан кетуіне тыйым салыпты. Бірақ соған қарамастан Дмитрий Писарев Шымкент асқан. Сөйтіп, сүйікті ісін сонда жалғастырған. Тіпті, шетелде демалып қайтыпты. Шымкенттік қыз-келіншектердің қас-көзін түзеген хирург суреттерін оңды-солды әлеуметтік желіде салып жүр. Соңғы отасын небәрі 5 күн бұрын жасаған екен. Яғни, әйелдің ернін үлкейтіп, тігіп берген. Осылайша, он ай бойы тайраңдаған дәрігерді тергеушілер ақыры Алматыға қайтарды.

«Аталған дәрігер қамауға алынған болатын. Сот алды тергеу барысында ол бұлтратпау шарасы ретінде қамалды. Алғашында ол екі айға қамалады. Содан соң ұзартылуы мүмкін”, – деді Алматы қалалық полиция департаментінің ресми өкілі Салтанат Әзірбек.

Лаура Ізбасарованың өліміне жекеменшік клиника да жауап беруі тиіс деп есептейді қара жамылған отбасының адвокаты. Айтуынша, жанжалдан соң клиника жабылмаған. Тек атауын өзгертіп қойған.

«Марқұм Лаура Ізбасарова ота жасатқан «Нова» клиникасы басшылығының да жауапкершілігі қарастырылып жатыр. Соған орай, бірнеше сараптама тағайындалды. Соның қорытындысы бойынша медициналық мекеме қожайыны да сотқа шақыртылады», – деді адвокат Сұңқар Нұрмағамбетов.

Дмитрий Писарев бұған дейін де бір келіншекке ота жасап, соңы қайғылы аяқталған. Дана Агамырданова оған артық майын алдырту үшін Украинадан арнайы келіп, мәйітханадан бір-ақ шыққан болатын. Сот хирургті тек екі жылдан соң кінәлі деп тапты. Десе де, істің ескіруіне байланысты артынша сот залынан босатып қоя берді. Темір тордан оңай құтылған хирургтің енді бұл жолы кінәсі дәлелденсе, 5 жылға дейін бас бостандығынан айыруы мүмкін.