Астаналық әкімдік «Абу-Даби плаза» жұмысшыларының митингке шыққанына қатысты ақпарат берді, деп хабарлайды Neonomad.kz ведомстваның сайтына сілтеме жасап. 

Белгілі болғандай, 3 шілдеде сағат таңғы 10.00 кезінде «Абу-Даби плаза» нысанының аумағында қосалқы мердігерлік ұйымдардың жұмысшылары жалақыны көтеруді және жұмыс жағдайын жақсартуды талап етіп, шыққан.

«Жиналғандармен қаланың мемлекеттік бас еңбек инспекторы Е. Ысмағұлов пен Есіл ауданының прокуроры Д. Катаев кездесті. Олар жұмысшыларға компанияның кеңсесіне барып, мәселені әкімдік басшылығының қатысуымен талқылауды ұсынды. Сағат 10:40-та олар жұмыс орындарына тарады. Бастамашы топ қала басшылығымен кездесті. Құрылыс компаниясының кеңсесінде Нұр-Сұлтан қаласы әкімінің орынбасары Н.Нүркенов қосалқы мердігерлік ұйымдардың басшыларымен, жұмысшылардың бастамашыл тобымен, сондай-ақ Әбу Даби плаза Арабтек консолидейтед контракторс лимитед жобасының жетекшісі Джон Кэмпбеллмен кездесу өткізді», – делінген әкімдіктің ақпаратында.

Кездесу барысында «Арабтек» компаниясының басшылығына тамақтануды ұйымдастыру, намазға жығылу үшін жағдай жасау, және инфляция болған жағдайда жұмысшылардың жалақысын көтеру тапсырылды.

«Кездесу сенімді атмосферада өтті және қоғамдық тәртіп бұзу тіркелген жоқ. Қазіргі уақытта құрылысшылар жұмысты штаттық режімде жалғастырып жатыр», – дейді әкімдік.