Аспан асты елінде тұтқындалған қазақ қызы Ақжарқын Тұрлыбайдың ісі неліктен ұзаққа созылып кеткенін адвокаты түсіндіріп берді, деп хабарлайды Neonomad.kz ақпарат агенттігі Tengrinews.kz сайтына сілтеме жасап.
Адвокат Сұңқар Нұрмағамбетовтың айтуынша, Қазақстанның құқық қорғау органдары Ақжарқын Тұрлыбайды нигериялық топтың құрбаны деп мойындамай отыр. Осының әсерінен Қытайда істің қаралуы ұзақ уақытқа созылған.
Бұған дейін Ақжарқын Тұрлыбай Қытайдың Гуанчжоу қаласының әуежайында тұтқындалған еді. Ол таныстарының өтініші бойынша бренд киімдерді Малайзияға алып өтпек болған. Алайда сөмкеден есірткі табылған-ды.
ҚР ҚПК 71-бабына сәйкес, қылмыстық құқық бұзушылықпен моральдық, физикалық немесе мүліктік зиян келген тұлға жәбірленуші деп танылуы мүмкін. Ақжарқын Тұрлыбай мен нигериялық азаматтың сыбайласының жауабына сәйкес, қазақстандық қыз есірткі алып бара жатқанын білмеген. Демек, оның қылмыс жасау туралы ойы болған жоқ, дейді Сұңқар Нұрмағамбетов.
Сонымен қатар, 30-дан аса адам осындай жолмен ұлтаралық есірткі тобының құрбаны болған. Олардың қатарында Ақжарқын да бар. Егер Қазақстан аумағында Ақжарқын Тұрлыбайға жәбірленуші мәртебесі берілсе, ол Қытайдағы процесте өзінің қорғану құқығын жүзеге асыра алады.
Адвокаттың сөзінше, ол сыртқы істер министрлігімен бірлесіп, Ақжарқынды жәбірленуші деп тану туралы өтініш берген. Алайда тергеу комитеті өтінішті ескермей, қанағаттандырудан бас тартып отыр. Ал еліміздің ішкі істер министрлігі 2014 жылы Нигерия азаматына қатысты ҚР ҚК 259-бабы 2-тармағына сәйкес қылмыстық іс қозғаған. Алайда бүгінде қашып жүрген күдіктінің іздестірілуіне байланысты істің мерзімі тоқтатылған.
Естеріңізге сала кетсек, Тұрлыбай 2014 жылы наурызда Гуанчжоу қаласының әуежайында есірткі контрабандасымен айналысты деген күдікпен ұсталған еді. 2015 жылы маусымда 21 жастағы қыз өмір бойына бас бостандығынан айыру жазасына кесілді. Кейін апелляциялық сот бұл шешімнің күшін жойған.
2016 жылы қарашада апелляциялық сот тыңдауы өтіп, коллегия шешім қабылдау үшін жиналыс бөлмесіне шығып кеткен еді.
Естеріңізге сала кетсек, жуырда Қытай түрмесінде отырған Ақжарқын Тұрлыбайға қатысты сот отырысы өткені туралы хабарлаған едік.
