Ақтауда тіс дәрігердің кішкентай пациентке дөрекілік танытқаны видеоға түсіп қалған болатын. Оқиғадан соң дәрігер жұмысынан босатылды, деп хабарлайды Neonomad.kz ақпараттық агенттігі Nur.kz сайтына сілтеме жасап.

Облыстық стоматологиялық орталығында шу шықты. Кішкентай балаға дөрекілік танытқан тіс дәрігері жұмыстан шығарылды. Бұл туралы орталықтың бас стоматологы Қуат Машырықов айтты.

Белгілі болғандай, әлеуметтік желіде тараған видеоны тексеру үшін арнайы комиссия құрылған. Осылайша, Еңбек кодексінің 64 бабы бойынша дәрігер қатаң сөгіс алып, жұмыстан босатылған.

«Дәрігердің өзі де жұмыстан кетуге ниет білдірді. Басында ол ауру балаға көмектеспек болған, алайда, жағдай басқаша өрбіді», – дейді Қуат Машырықов.

Дегенмен, медициналық орталықтың басшысы жас дәрігерді білікті маман ретінде сипаттап отыр. Айтуларынша, бұған дейін ол ешқандай жағымсыз қылық танытпаған.

Сонымен қатар, баланың анасы Ақтау қаласы полиция департаментіне арыз түсірген. Қазір сот-медициналық сараптама жүргізілуде.

Егер балада ұрып-соғудың белгілері анықталса, тіс дәрігері ҚР әкімшілік құқық бұзушылық кодексінің 73 бабы 1-бөлігі бойынша жазаға тартылады. Ал егер ондай белгілер анықталмаса, аталған кодекстің 73 бабы 2-бөлігінде қарастырылған шара қабылданады, деп жазады басылым.

Еске сала кетсек, Ақтауда тіс дәрігері емдеу кезінде кішкентай баланы жұлқылып дөрекілік танытқаны видеоға түсіп қалғаны туралы жаздық. Оқиға 1 қазанда болды.