Ақтөбе театрының басшысы болып 29 жастағы Олжас Ибраев тағайындалды, деп хабарлайды Neonomad.kz ақпараттық агенттігі Тахауи Ахтанов атындағы драма театрдың баспасөз қызметіне сілтеме жасап.
Жаңа басшыны театр ұжымына Ақтөбе облысының мәдениет басқармасының басшысы Нұрхан Қадырбаев таныстырды.
Олжас Ибраев Қазақ ұлттық өнер университетінің «драма театры мен кино актері» мамандығы бойынша диплом алған. 2013 жылы «Жігіт сұлтаны-2013» республикалық телеконкурсының жеңімпазы. «Хабар» арнасында Қазақстанның тарихи мұрасы туралы «Менің жерім» бағдарламасында тележүргізуші болып жұмыс істеді. Әр жылдары «Астана мюзикл» театрының труппасын, Мұхтар Әуезов атындағы Қазақ мемлекеттік академиялық драма театрының шығармашылық бөлімі мен халықаралық қатынастар және гастрольдер бөлімін басқарды, Темірбек Жүргенов атындағы Қазақ ұлттық өнер академиясының Ұлттық өнер факультетінің деканы болды. «Айжан», «Шекара» телехикаяларында және «Али» фильмінде басты рөлдерді ойнады.
