Ақтөбе облысында журналистер отырған микроавтобус аударылды, деп хабарлайды Neonomad.kz ақпарат агенттігі Ratel.kz сайтына сілтеме жасап.
Облыстық ішкі істер департаменті мен облыстық әкімдік өкілдері бұл жағдайға қатысты қандай да бір ақпарат беруден бас тартып жатыр. Тек ІІМ өз сайтында қысқа ғана ақпарат жариялады.
«26 қаңтар күні сағат 09:30 кезінде «Самара-Шымкент» авто жолының 1024-ші километрінде, Ақтөбе облысы, Әйтекеби ауданы, Ұлғайсын ауылында жол-көлік апаты болды. Toyota Hiace көлігінің жүргізушісі Қарабұтақ ауылынан шығып Ырғыз ауылына қарай кетіп бара жатқанда жолдың оң жағына қарай аударылған. Оқиғаның мән-жайы анықталып жатыр. Жүргізуші мен 2 жолаушы әртүрлі жарақатпен ауруханаға жатқызылды», – делінген хабарламада.
Белгілі болғандай, бұл автобусты облыс әкімдігі журналистерге жалдап берген. Осыдан кейін БАҚ Шалқар ауданы әкімінің баяндамасын тыңдауға аттануы тиіс болған. Қарабұтақ пен Ырғыз арасында микроавтобус трассадан ұшып кетіп, үш рет аударылған.
Жол-көлік апаты кезінде көлікте 8 адам отырған. Бәрінен көп жүргізуші зиян шеккен. Себебі, оны есік қысып қалған. Журналистердің бірі Ардақ Ерубаева қолын сындырды. Куәгерлердің айтуынша, «Қазақстан – Ақтөбе» телеарнасының тілшісі Әлия Таласова зиян шеккен.
