Темірден түйін түйген балқаштық келіншек ойын алаңдарын жасап, тұтынушыларды тәнті етіп жүр. Кәсіпкерлік пен ұсталықты ұштастырып, «нарыққа жаңаша леп әкелем» деген Әдемі Есеншораева ерекше кәсіптің қыр-сырын айтып берді, деп хабарлайды Neonomad.kz ақпарат агенттігі Stan.kz сайтына сілтеме жасап.

«Ең алғашқы кәсібіміз – фотосалон болатын. Жолдасыммен соңғы рет жаңа жылдық шырша саттық. Ісіміз дөңгелеп, 10 метрлік шыршаға тапсырыстар түсе бастады. Сварщиктер жалдап жүріп, кейін неге өзім де жасап көрмеске деп қолыма дәнекерлеуші құралды ұстап көрдім. Маған қызық болып, әр жасаған жұмысыма қарап ләззат алдым. Осылай дәнекерлеу ісін меңгердім, – дейді 25 жастағы келіншек.

Әдемінің өткір құралдар мен оттың арасына түсуіне жолдасы қарсы болмаған. Қайта оны демеп, жасаған өнімдерін саудаға шығаруға кірісіп кеткен. Кәсіпкер бұл ісін қыз балаға жат санамайды.

Тіпті, еңбектің де ебін таба білген ол әкімдіктен жалға жер алып, арнайы шеберханасын ашқан. «Бизнес бастаудың» арнайы жобасына қатысып, нарық заңдылықтарын игере бастаған Әдемі жолдасымен қат-қат болмаса да, өтімді дүние өндіруге көшкен.

Сурет: Stan.kz