Америкалықтар асырап алғаннан кейін трансгендерге айналған қазақ баласы көз жұмды. Небәрі 17 жасында фотография саласы бойынша биіктен көрініп үлгерген Дэвиннің өлімі жайлы бірнеше шетелдік басылымдар жарыса жазды. Алайда, оның қазасының себебі айтылмай отыр, деп хабарлайды Neonomad.kz ақпарат агенттігі Астана арнасына сілтеме жасап.
Дэвин 2001 жылы 16 қазанда Қостанайда туған. Шын есімі – Айсұлу. Оны 1 жас 2 айлық шағында америкалық отбасы бауырына басыпты. Зерек бала кішкентайынан гимнастика, би және сурет салумен айналысқан. Фото саласында ұлттық марапаттарға ие болған. Қысқа ғана ғұмырында үлкен жетістікке жеткен жігіт жайында шетелдік басылымдар жарыса жазды. АҚШ-қа Диана деген жаңа есімді алып кеткен өрімдей қыздың, кейіннен қалайша Дэвинге айналып кеткені белгісіз.
«Ол баланың бізден кеткеніне ұзақ уақыт өтті. Архивті ақтарып отырып, оның бізге 1 айлық кезінде түскенін анықтап отырмыз. 2002 жылдың 10 желтоқсанында оны асырап әкетті. Денсаулығында еш ауытқу болмаған. Біздің балалардың барлығының да дені сау», – деді «Дельфин» сәбилер үйінің бас дәрігері Өмірбек Байкенов.
Шетел азаматтары 2015 жылдан бері ел аумағынан 156 баланы асырап алған. Биылғы жылы бір де бір қазақтың қарагөзі жат елге аттанбапты. Ал былтырғы жылы 8 бала басқа мемлекеттің қамқорлығына кеткен. Басым бөлігі 1 мен 9 жас аралығындағы балалар.
«Біз қазір шетелге балаларды жіберіп жатқан жоқпыз. Бірінші кезекті өз еліміздегі мұқтаж отбасыларды қамтып жатырмыз. Қазірдің өзінде ел азаматтарынан 4 мың өтініш түскен. Оларға қойылатын талап, шетел азаматтарымен салыстырғанда жеңілірек. Ал шетелге асып кеткендердің тыныс-тіршілігі туралы біздің сыртқы істер министрлігі үнемі хабардар болып отырады», – деді ҚР БҒМ балалардың құқықтарын қорғау комитетінің бас сарапшысы Гүлмира Күлсариева.
Бүгінде 20 000 қазақстандық баланы шетел азаматтары тәрбиелеп отыр. Оның 6000-ның мүмкіндігі шектеулі болған. Балалар құқығын қорғап жүрген Аружан Саин денсаулығында кінәраты бар балаларды асырап алуда мұқият болған жөн дейді.
«Баланың диагнозын анықтау ресейлік дәрігерлермен байланысу қажет. Есіңізде болсын, бұл диагноз сәйкес келмейді және әдетте ешқандай еуропалық немесе америкалық диагнозмен сәйкес келмейді», – дед балалар құқығы жөніндегі уәкіл.
Жат ел азаматтарының бала асырап алу процесін қазақстандық 12 агенттік іске асырады. Олар қазір АҚШ, Бельгия, Италия, Испания, Англия, Канада елдеріне ғана рұқсат етілген.
Естеріңізге сала кетсек, АҚШ азаматтары асырап алған қазақстандық баланың көз жұмғаны туралы хабарлаған едік. Әзірге оның қалай көз жұмғаны белгісіз.
