Нұр-Сұлтанда көпір салып жүрген қара жұмысшылар 9 айдан бері қолдарына ақша алмапты. «Ертең, арғы күні» деген алдау естіп келген олар енді бас көтерді, деп хабарлайды Neonomad.kz ақпараттық агенттігі «Астана» арнасына сілтеме жасап.
Жалақысыз жұмыс істеп жүрген адамдар «үйге кіруге ұяламыз» дейді. Өйткені бала-шаға қолыңа қарайтыны бар. 9 айдан бері айлық көрмеген жұмысшылар құрылыс компаниясының алдында ереуіл ұйымдастырды.
«Біз голодовка істейміз. Түнімен осы жерде жату керек пе, жатамыз. Пока біздің ақшамызды бермегенше», – Шайра Рузметова, аспаз.
Ереуілге шыққан жұмысшыларды көрген уческе полицейі бас көтергендерді сабырға шақырып, бір жерге үймелеп тұрмауларын сұрады. Әрине, үйіне тоғыз ай бойы жалақы ақша апармаған ашулы жұрт оны тыңдайтын ба еді? Талаптарын айтып, жиналған жерден жылжымады. Олардың жанайқайын естіген Мемлекеттік еңбек инспекторы араға түсті.
«Бухгалтерияға осы жиналған жұмысшылардың тізімі жіберілді. Бүгін-ертең жалақы шоттарына аударылады», – Александр Попов, Жоба жетекшісі.
Еңбек инспекторының айтып отырған тізіміне 26 адам ғана енген. Алайда айлығын ала алмай, ауылдарына қайтып кеткені бірталай.
Бұны ескерген компания басшысы алдағы күні ол жұмысшыларда еңбекақысын алады, деп сендірді. Екі айдан бері толассыз түсіп жатқан арыз-шағымдарға сүйенген еңбек инспекциясы көпір салатын компанияны тексермек.
«Бүгін мына мәселені шешкеннен кейін, ертең осы жерде істеген басқа адамдар арызбен қайтадан келеді ғой. Солар арызбен келмесі үшін сол мекемемен тексеру барысында жұмыстар жүргізіледі», – Төлеген Оспанқұлов, Мемлекеттік еңбек инспекциясы.
