Алматылық Бибіжамал әжей Мақтаарал тұрғындарына көмек көрсетті. Сексенді алқымдаған әжей қиындықта қалған отбасыларға дер кезінде қол ұшын созды, деп хабарлайды Neonomad.kz ақпарат агенттігі Stan.kz сайтына сілтеме жасап.
Бибіжамал апа жастайынан жесір қалған. Жолдасының өмірден озғанына 38 жыл болды. Он баланы жалғыз асырап, бүгінде бала-шағасының ортасында отыр. Осы күнге жеткізген Аллаға сансыз мадақ айтады.
«Жолдасым қайтыс болғанда кенжем 1 жаста еді. Он баланы бағып, осы күнге жеткізді. Өзім әке көрмей өстім. Әкем менің 1 жасымда өмірден өткен. Қазір Аллаға шүкір, 50 шөберем бар, 39 немерем бар. Бәрі Алланың арқасы», – деді әжей.
Аты-жөнін толық атамаған Бибіжамал апа 480 отбасыға конверт таратты. Әр конвертте 70 мың теңгеден ақша салынды. Мұны Алла алдындағы зекетім деп біледі.
Посмотреть эту публикацию в Instagram
Көмек алған отбасылар мен өзге жандар аяулы әжемізге алғысын айтты.
«Сізге Алла ұзақ ғұмыр берсін. Ұрпағыңызға сауабы болсын», «Жүз шақты адамға 70 мың теңгеден беру оңай емес, Алла сізге разы болсын», «Бұл ісіңіз үлгі болып, өзге де азаматтардың зекет беруін нәсіп етсін», – деді көпшілік.
Әжейге Алла ұзақ ғұмыр беріп, тілеуін қабыл етсін.
