Қаратауда кәмелетке толмаған кішкентай қызды зорлап, оның денесін өртеп жіберген Қаратау тұрғыны өмір бойына сотталды, деп хабарлайды Neonomad.kz ақпараттық агенттігі ҚазАқпарат сайтына сілтеме жасап.
Жамбыл облысының қылмыстық істер жөніндегі мамандандырылған ауданаралық соты 37 жастағы ер адамға қатысты сот үкімін шығарды.
Күдікті ҚР азаматы, Қаратау қаласының тұрғыны, еш жерде жұмыс істемейтін, үйленген, бұған дейін «Ұрлық» бабы бойынша істі болған.
Қылмыстық істі сотқа дейінгі тергеп-тексеру нәтижелері жеті томды құраған. Сотталушы жыныстық зорлық-зомбылықтың екі эпизоды бойынша айыпталған: ҚР ҚК-нің 121-бабының 4-бөлігі және 99-бабының 2-бөлігі (кәмелетке толмағанға қатысты кісі өлтіру), сондай-ақ 24-бабының 3-бөлігі, 120-бабының 4-бөлігі (2013 жылғы оқиғаға қатысты) бойынша.
«Бүгін Жамбыл облысының қылмыстық істер жөніндегі мамандандырылған ауданаралық сотында 8 жасар қыз баланы өлтіру ісі бойынша үкім жарияланды. Қылмыскер өмір бойына бас бостандығынан айыру жазасына кесілді. Прокуратураның сотталушыны өмір бойына қамау туралы талабы толық көлемде қанағаттандырылды. Үкім заңды күшіне енген жоқ», – деп хабарлады Жамбыл облысы Прокуратурасының баспасөз қызметінен.
Еске сала кетсек, жантүршігерлік оқиға Қаратау қаласында орын алды. Аруай Берік есімді кішкентай қыз жоғалып кеткен болатын. Бір күн өткен соң оның денесі қала шетінен табылды. Өлген денесі баллонға салынып, өртеп жіберілген. Толығырақ оқыңыз.
