Қазақстандық танымал спортшы Майя Манезаға жол-көлік оқиғасы үшін айыппұл салынды, деп хабарлайды Neonomad.kz ақпарат агенттігі қалалық соттың баспасөз қызметіне сілтеме жасап.
2019 жылдың тамыз айында Volkswagen маркалы көлікті тізгіндеген Майя Манеза Қарасай батыр мен Жароков көшелерінің қиылысында Toyota Camry көлігіне соғылған. Оқыс оқиға салдарынан көліктерге механикалық зақым келген.
«Сотта құқық бұзушы Майя Манеза өз кінәсін мойындап, жасаған әрекетіне өкінетінін жеткізді. Құқық бұзушының кінәсі әкімшілік құқық бұзушылық туралы хаттама, жол полициясы инспекторының баянаты, оқиға кестесі, тараптардың түсініктемелері, сонымен қатар, істің басқа да материалдарымен толықтай дәлелденді», – делінеді хабарламада.
Сот Майя Манезаны кінәлі деп таныды. Ол 50 500 теңге көлемінде айыппұл төлеуге міндеттелді. Үкім заңды күшіне енген жоқ.
