Түркістан облысында 700-ден астам бала оқитын мектепте оқыс жағдай болып, барлық оқушы аяқ астынан қауіпсіз жерге көшірілді. 30 бала мен 2 мұғалім және тағы екі техникалық қызметкер жедел жәрдеммен ауруханаға жеткізілді. Дәрігерлер олардың денсаулығы бірқалыпты дегенімен, 11 оқушыны үйіне жібермей, аурухана төсегіне жатқызыпты. Аяқ асты болған жәйттен тәртіп сақшылары да аяғынан тік тұрған, деп хабарлайды Neonomad.kz ақпарат агенттігі Еуразия бірінші арнасына сілтеме жасап.
Оқыс оқиға Леңгір қаласында болды. №7 мектептің 10-сыныбында оқитын қыз бала көшеден белгісіз құты тауып алып, оны өзі оқитын білім ордасына алып келіпті. Үзілісте дәлізде әлгі құтыдағы белгісіз сұйықтықты әтір екен деп үстіне шашқан. Сол уақытта өзі мен айналасында тұрған бірнеше бала жөтеліп, жайсыз сезіне бастаған. Әлгі жағымсыз иіс лезде мектептің тұтастай бір блогына жайылып үлгеріпті.
«Спрей деп ойлаған ол. Ол әдейілеп сепкен жоқ. Себебі, қыз баланы оны өзіне сеуіп көрген. Денесіне сеуіп көрген. Яғни, бұдан шығатын қорытынды, қыз бала оны әдейілеп әкелген жоқ және оның ондай зат екенін де білмеген», – дейді №7 мектеп директоры Жамбыл Орынбаев.
700-ден астам оқушы мен мұғалім және басқа да қызметкерлер шұғыл қауіпсіз жерге көшірілген. Ұстаздар балаларды аулаға шығарып алып, жеке-жеке тексерген. Қосымша 2 медбике де медициналық көмек көрсеткен. Өзін жайсыз сезінгендерді жедел жәрдеммен қала берді, мектеп мұғалімдерінің жеке көліктерімен ауруханаға жөнелткен.
Белгісіз сұйықтықтың әсерінен Леңгір қалалық ауруханасына 34 адам келіп түскен. Оның 30-ы балалар болса, қалғаны ересектер. Арасында мұғалімдер мен еден жуушылар бар. Алғашқы медициналық көмек көрсетіліп бірсыпырасы үйіне қайтарылған. Қазір, қалалық ауруханада 11 оқушы жатыр.
Дегенмен, дәрігерлер аурухана төсегінде жатқан балалармен біздің сұхбаттасуымызға қарсы болды.
«Тұрақты ем қабылдап жатыр, бұйыртса, ертең үйлеріне шығарамыз» деп қысқа қайырды.
«Оларға симпоматиялық ем қолданып жатыр. Тағы қайталып айтамын, олардың жағдайлары қанағаттанарлық. Бүгінгі таңда обход жасап шықты. Шағымданушы жоқ», – деді Леңгір қалалық ауруханасы бас дәрігерінің орынбасары Шындос Әбдіхалықов.
Оқыс оқиға болған кезде бірінші ауысымда 711 бала оқып жатқан. Басы айналып, жүрегі айныған 7, 8 және 10-сыныптың оқушылары екен. Осы күні, олардың алды сабақтарын жалғастырып жүр. Бірақ, мектеп басшысы шәкірттермен тілдесуге рұқсат етпеді. Тек, болған жайтты айтып беруге ғана келісімін берді.
Осы күні, аталған іспен Төле би аудандық полиция бөлімі айналысып жатыр. Тергеп-тексеру амалдарын жүргізуде. Ал, мектеп әкімшілігі болса, сол күнгі өтпей қалған сабақтарды сенбіге алмастырған. Оның ішінде екінші ауысымның балалары да бар.
