Алматыда көлік астында тапталып, жазым бола жаздаған жігіттердің бірінің беті бері қарай бастады. Өздерін қасақана темір тұлпармен басып өткендер ішімдікке сылқыя тойып алып, төбелесті аяқасты ашты дейді. Тіпті, қолдарында қару болғанын айтады, деп хабарлайды Neonomad.kz ақпарат агенттігі Еуразия бірінші арнасына сілтеме жасап.

Қолы сынып, үш күннен бері төсек тартып жатқан еңгезердей азамат көліктің астында тапталған жігіттердің бірі. Отадан кейін енді ғана өз-өзіне келуде. Полицейлердің мәлімдемесімен мүлдем келіспейді. Ол жігіттермен бір кафеден шықпағанын айтады. Сол күні Сергей Хан екі досы және туысқан інісі төртеуі отбасылық бас қосудан соң, дүкенге сусын алуға кірген екен. Сонда жігіттердің топтасып тұрғанын көріпті. Алайда оларды бұрын-соңды көрмегенбіз, танымаймыз дейді.

«Текетірес бір топ жігіттің менің бауырымды ұрғанынан басталды. Біз алғашында түсінбедік. Мүмкін олар әлдекімдермен шатыстырған шығар деп ойладық. Барынша тынышталдыруға тырысып едік, көнбеді. Сөйтіп, төбелестің көкесі басталды. Біз төртеу, ал олар бізден екі есе көп», – дейді зардап шегуші Сергей Хан.

Әуелі сабырлық сақтадық, ақыры болмаған соң төбелесе кеттік дейді. Бірақ, мас жігіттердің қолдарындағы қаруды көріп, жолға қарай қашқан. Соңынан қуып жете алмағандар, көлікпен сонда таптап өте шығыпты.

«Жігіттердің бірінен қару түсіп кетті қолынан. Бірақ, нақты кімнің қолынан екенін, қарудың травматикалық не оқпен екенін тағы айта алмаймын. Бірақ, нақты болды. Жолға қарай жүгіргенімізде көлікпен қуа жөнелді. Тоқтатып, шығуын талап еттік. Екінші бүйірімізден қарасы кеп таптап өтті», – дейді зиян шеккен азамат.

Естеріңізге сала кетсек, осы уақытқа дейін көліктің үш адамды әдейі мыжып өткені туралы хабарлаған едік.