Нұр-Сұлтанда Ұлттық тестілеу орталығының бұрынғы директоры бас бостандығынан айырылды, деп хабарлайды Neonomad.kz ақпараттық агенттігі Zakon.kz сайтына сілтеме жасап.
«Ол қонақ үй қызметін көрсету бойынша шарттарды бұзбағаны, орындалған жұмыс актілеріне кедергісіз қол қойғаны, жүгенсіздікке жол бергені және жалпы қамқорлығы үшін 5 млн теңге сомасында пара алды деп күдіктелген», – делінген ҚР Сыбайлас жемқорлыққа қарсы қызмет таратқан хабарламада.
Пара алды деп күдікке ілінген Әлімқұловқа қатысты үкім 22 қарашада Нұр-Сұлтан қаласының қылмыстық істер жөніндегі мамандандырылған ауданаралық тергеу сотында шығарылды. Үкім бойынша ол 3,5 жыл бас бостандығынан айырылды.
Аталған тұлға мемлекеттік қызметте лауазым иелену құқығынан өмір бойына айырылды.
Еске сала кетейік, 24 мамырда Білім және ғылым министрлігі Ұлттық тестілеу орталығының бас директоры Рамазан Әлімқұлов қамауға алынғаны белгілі болды. Тергеушілер оның қылмысы әкімшілік-шаруашылық қызметке байланысты болғанын нақтылаған.
