Қолы сынған баласын халық емшісіне апарған шымкенттік ата-ана қайғыдан қан жұтып отыр. Олар ұлын дер кезінде дәрігерге көрсетпегені былай тұрсын, баласының жарақатын асқындырып алыпты. Оның арты орны толмас қайғыға ұласып, жасөспірімді қараған сынықшы тергеуге алынған. Ал оның әйелі болса, кінәнің бәрі сыныққа салғырттық танытқан ерлі-зайыптыларда дейді. Оқыс жайттан соң емшінің өзі стресске түсіп, бірнеше рет жәдел дәрдем көмегіне жүгінген, деп хабарлайды Neonomad.kz ақпарат агенттігі Еуразия бірінші арнасына сілтеме жасап.

Қайғылы жағдай №18 шағын ауданда болған. Осында тұратын халық емшісіне ата-анасы бір апта бұрын қолы сынған жасөспірімді емдеткен. Сынықшы оның қолын қайта салып беріпті. Алайда, жарақат жазылудың орнына баланың денсаулығына кері әсер ете бастаған. Сол кезде анасының өтініші бойынша емші күнделікті ем-дом жасап, бақылап отыру үшін баланы өз үйі маңындағы уақытша пәтерге орналастырған. Бірақ, неге екені белгісіз жасөспірімнің хәлі аяқ астынан нашарлап, жедел жәрдем жеткенше көз жұмған.

Ал емшінің жұбайы оның маңына шаң жуытар емес. Ол күйеуінің қайғылы жағдайдан кейін күйзеліске ұшырап, науқастарды қабылдауды тоқтатқанын айтады.

«Ешқандайда бұл жерде болған емес. Ол бір апта келіп кеткен адам. Ештеме анықталмаған. Сол үшін бірнәрсені бізге жабуға асықпаңыздар. Уақыт-сағаты келеді, барлығының ақ-қарасы шешіледі. Жарай ма? Дәл қазір асықпаңыздар. Емші стресте. Шокқа түсіп қалған, күніге жедел жәрдем шақырып жатырмыз. Сол үшін мазаламаңыздар, өтініш сіздерден», – деді халық емшісінің жұбайы Ақмарал.

43 жастағы халық емшісін жергілікті жұрт, ел жақсы таниды екен. Көршілерінің айтуынша, оған алыс-жақын шетелдерден де көптеген адам іздеп келетін көрінеді.

«Мен мұндай адам көрген емеспін. Әр жерден барып, рентгенге түскен емеспін, бірақ қаралғанмын. Осы кісі ғана мені емдеп берді. Соған мен ризамын. Өз басым разымын. Мен ғана емес, мыңдаған адам разы. Енді бұл кісі мен құдай емеспін деп айтады. Кішкене кезінен дарыған», – дейді емшінің көршісі Бақытжан Жасұзақұлы.

Осы күні аталған дерекпен Шымкент полиция департаменті айналысып жатыр. Қылмыстық кодекстің 104-бабы, 1-бөлігімен сотқа дейінгі тергеп-тексеру амалдарын бастап кеткен.

Ал көз жұмған жасөспірімді туыстары жер қойнына тапсырған. Ал бүгін жетісін беріпті.