Ішкі істер министрінің тапсырмасы бойынша арнайы комиссияның жұмысы жалғасуда. YouTube видеохостингінде колония қызметкерлерінің сотталғандарға қатысты күш қолдануы туралы материалдар жарияланғаннан кейін Алматы облысы бойынша қылмыстық-атқару жүйесі департаментінің ЛА-155/8 мекемесіне (Заречный кенті) дереу комиссия жіберілген. Осы тексерістің нәтижесі белгілі болды, деп хабарлайды Neonomad.kz ақпарат агенттігі.
«Қызметтік тергеу нәтижелері бойынша тәртіптік негізде аталған мекеме мен Алматы облысы қылмыстық-атқару жүйесі департаментінің 14 лауазымды тұлғасы жазаланды» – деп атап өтті Ерлан Тұрғымбаев.
Сонымен қатар, теріс себептермен ішкі істер органдарынан 7 қызметкер, оның ішінде 2 мекеме бастығының орынбасары жұмыстан шығарылды.
Тәртіптік сипаттағы шаралармен қатар, Алматы облысының арнайы прокурорлар басқармасы ҚР ҚК 146-бабы 2-бөлігі бойынша қылмыстық істерді тергеу шеңберінде 7 қызметкерге қатысты тергеу изоляторына қамауға алу түріндегі бұлтартпау шарасын тағайындалды.
Сонымен қатар, мекеме бастығы және Алматы облысы қылмыстық-атқару жүйесі департаменті бастығының орынбасары қызметінен босатылды.
Атап өтер жайт, қазіргі уақытта қылмыстық-атқару жүйесі қызметкерлерінің осындай қылмыстар мен құқық бұзушылықтарға итермелейтін алғышарттарды жою бойынша жүйелі шаралар кешені қабылдануда.
Министр, сондай-ақ, ағымдағы жылдың 24-25 сәуірінде Алматы облысы ҚАЖ департаментінің ЛА155/14 мекемесінде тінту іс-шаралары фактісі бойынша қызметтік тексеру жүргізу барысы туралы атап өтті.
Тексеру барысында 30 ұялы телефон, 16 зарядтау құрылғысы, 3 құлаққап, 54 шаншу-кесетін заттар (бір рет қолданылатын станоктың жүзі – 34, тырнаққа арналған қысқыштар – 5, қайралған металл заттар – 6, қайшы – 9), азаматтық үлгідегі заттар – 50, қолдан жасалған 2 қайнатқыш табылды.
Осы факті бойынша қазіргі уақытта қызметтік тексеру жүргізілуде.
ҚР Сыбайлас жемқорлыққа қарсы іс-қимыл агенттігіннің Алматы облысы бойынша департаменті азаптау туралы сотталғандардың өтініштері негізінде тергеу жүргізуде.
Тексеру барысында барлық оқиғалар қатысушылардың және оларға жол берген адамдардың іс-әрекеттеріне құқықтық баға берілетін болады.
