Алматы перзентханаларының бірінде жаңа туған ана қайтыс болып, оған қатысы бар деген күдікпен 4 адам қызметінен шеттетілді, деп хабарлайды Neonomad.kz KTK арнасына сілтеме жасап. 

Қайғылы оқиға бір апта бұрын болды. Алматының №1 перзентханасында 27 жастағы көпбалалы ана қайтыс болды. Жүкті әйелдің іш қуысына қан кетіп, оны дәрігерлер шұғыл түрде кесар тілігі арқылы босандырып алған.

Нәресте аман, ал оның анасын құтқару дәрігерлердің қолынан келмеді.

Белгілі болғандай, әйелдің артында үш баласы қалды. Туыстары дәрігерлердің салғырттығынан кетті дейді. Қазір осы жағдайға байланысты комиссия қызметтік тексеріс жүргізуде.

«Периниталдық орталықтың қызметкерлері тиісті медициналық көмекті көрсеткен. Бірақ келіншекті аман алып қалу мүмкін болмады. Кешенді тексеру жұмыстары басталды. Комиссия құрамына республикалық ұйымдардың өкілдері, денсаулық сақтау министрлігінің тауарлар мен қызметтердің сапасын бақылау комитеті кірді. Тексеріс қорытындысы полиция департаментіне жеберілетін болады», – дейді Алматы қалалық Қоғамдық денсаулық сақтау басқармасы басшысының орынбасары Әсел Бейсенбаева.