Павлодарда 22 отбасы заңсыз түрде атаулы әлеуметтік көмекті алып келген, деп хабарлайды Neonomad.kz ақпараттық агенттігі «Астана» арнасына сілтеме жасап. 

Жұмыспен қамту орталығының мамандарының айтуаншы, мемлекеттен көмек алу үшін павлодарлықтар кіріс көзін жасырып, тіпті жылжымайтын мүліктері мен бағалы заттарын жақындарының атына тіркепті. Тексеру барысында олардың табысы шектік мөлшерден асып кеткен.

«Көбісі болғанда жеке меншік кәсіпкерлер де жұмыс істейді. Ол кісілер болғанда еңбегін алуын алып алған. Бірақ, ол кісілердің пенсионный очислениесі зейнетақы қоры кейін 3 айдан кейін 5 айдан кейін жіберген. Сол кезде біздің учасковой комиссия тексеріп отырып, сондай фактілерді шығарады», – дейді Аманбек Ұнатұлы, Павлодар қалалық жұмыспен қамту орталығы директорының орынбасары.

Маманның айтуынша, биыл мемлекеттен берілетін көмекті алуға 11 мың 375 адам өтініш білдірген. Осылардың тек 3 мың 275 отбасына әлеуметтік көмек тағайындалған. Енді жұмыспен қамту орталығы тұрғындарға алған жәрдемақыларын қайтаруды талап етіп отыр.

Бұған дейін аймақ әкімі Павлодар облысында коттеджде тұрып, жеке бизнесі бар тұлғалардың да мемлекеттен көмек алып келгенін айтқан болатын. Ол кезде тек 5 отбасы ғана анықталған еді, дейді телеарна.