Аудандық партия филиалы төрағасының бірінші орынбасары Қуат Сұлтанұлы Байғоджаев 2021 жылдың 10 қаңтарында өтетін Парламент мәжілісі мен мәслихаттары сайлауына дайындықтың қалай жүріп жатқанын әңгімеледі. Алматы облысы Еңбекшіқазақ аудандық партия мүшелерінен белсенді, түрлі салада еңбек етіп жүрген 64 адам кадрлық резервке енгізілген, ал праймеризге қатысушылар саны жүзге жуық адамды құраған. Бұл азаматтар сайлауалды бағдарламаларын көпшілікке таныстырып, нәтижесінде 11-і облыстық мәслихат депутаттығына үміткер болды. Сондай-ақ, Праймериз нәтижесінде 50 кандидат аудандық мәслихатқа үміткер ретінде аудандық сайлау комиссиясында тіркеліп, құжаттары рәсімделді, деп хабарлайды Neonomad.kz ақпарат агенттігі.
Қуат Сұлтанұлы мүшелік ететін штабқа 15 адам тіркелген. Зейнеткер әрі жастардан құралған 7 штаб мүшелеріне ақы төленеді. 333 сенімді өкіл орталық сайлау комиссиясына тіркеліп, тиісті құжаттары тапсырылды. Әлем халқына қауіп төндірген қатерлі дерт өршіп тұрғаны ескеріліп, үгіт-насихат жұмыстарына жауапкершілігі аса жоғары «Jas Otan» жастар қанатынан 221 волонтерлері тартылды.
«Волонтерлер үшін қыс мезгілінде жұмыс істеу оңайға соқпайды. Осы орайда ерікті жастарға санитарлық талаптарды қатаң сақтау керек екені түсіндіріліп, әрқайсысына партия логотипі бар сөмке, бас киім және қыстық жылы күртеше беріледі. Міндетті түрде еңбегі үшін 78 мың теңгеден табысталады. Ал сайлауалды бағдарламасына келер болсақ, атқарылатын жұмыстар 7 бағытта жүргізіледі және олар бұрынғыға қарағанда өзгерек. Пандемия адамның өмірі мен денсаулығы еліміздің басты құндылығы екенін тағы да бір айқындап берді. Коронавируске байланысты үлкен қиындықтарға тап болғанымызға қарамастан, «Nur Otan» партиясы азаматтарымыздың жұмыспен қамтылып, жаңа жұмыс орындарының құрылуы үшін бар күш-жігерін салды. Осының арқасында ауданда өмір сүру барынша қауіпсіз болмақ», — деп Қуат Байғоджаев баса назар аударылып отырған мәселелерді атады.
Филиал төрағасының айтуынша, әлемдік пандемияға қарамастан, өңірде жұмысшылардың жаппай қысқарылып қалуына жол берілмеген. Осы іспеттес қиындықтардың алдын алу үшін импортты жаңа өнім шығаратын өндіріс орындары көптеп ашылмақ. Нақты сандарға келсек, 2,5 мыңнан астам жұмыс орны құрылып, орташа жалақы 150-175 мың арасында тұрақтайды.
Әзірдің өзінде партия 7 187 адам жұмыс істейтін 994 шағын кәсіпкерліктің жұмысын қалпына келтіріп, «Атамекен» ҰКП-мен бірге түрлі пайдалы бағдарламаны қолға алған. Бұған дейін аталған кәсіпкерліктердің жұмысы тоқтап қалған еді.
«Өңірдегі азаматтар үшін жол және су мәселесі бірінші орында тұрады. Осы орайда 2025 жылға қарай маңызды деген жолдардың үлесін тағы да 4 пайызға арттырғалы отырмыз. 11 ауылда кезең-кезеңімен жолдар жөнделеді. Сондай-ақ, 5 жыл ішінде ауылдық жердің тұрғындары 95 пайыз сапалы сумен қамтамасыз етіледі. Азаматтардың алғашқы медициналық көмек алуына, онкологиялық ауруларға шалдықпауына барлық жағдай жасалады. Онкологиялық науқастар көптеген тегін дәрілік препараттармен қамтамасыз етіледі. 14 жаңа медициналық құрылыс қолға алынып, онда білікті мамандардың жұмыс істеуі мәселесі де шешіледі. Бұл шаралар жалпы өлім-жітімді 1 000 адамға шаққанда 6,25-тен 5,96 жағдайға дейін төмендетуге мүмкіндік береді», — деді Қуат Сұлтанұлы.
Партия балалар мен оқушылардың сапалы білім алу мәселесін де назардан тыс қалдырмаған. Материалдық-техникалық базасы бар білім мекемелері салынып, үш ауысымда жұмыс істейтін мектептер болмайды.
Естеріңізге сала кетсек, мемлекет басшысы Қасым-Жомарт Тоқаев онлайн режимде өтіп жатқан Ұжымдық қауіпсіздік туралы шарт ұйымының саммитінде:
«Қазақстанда кезекті электорал процесс басталды. 2021 жылдың 10 қаңтарына Парламенттің төменгі палатасы мен жергілікті органдардың депутаттарын сайлау белгіленді. Сайлау конституциялық мерзімде өтеді. Биыл біз теңдессіз демократия реформаларын іске асырдық. Ол реформалар көппартиялықты және саяси бәсекелестікті дамытуға, азаматтық белсенділікті арттыруға бағытталған. (…) Біз ашық әрі әділ сайлау өткізуге ниеттіміз. Әріптестеріміздің қолдауына үміттенеміз.(…) “, — деген болатын.
Сайлауалды үгіт-насихат бағытындағы материалдар «Nur Otan» партиясы Алматы облысы Еңбекшіқазақ аудандық филиалының сайлау қорынан төленеді.
