Заң саласында білім алып, бүгінде жеке кәсібін дөңгелетіп отырған Максим Келлер ислам дінін қабылдағаннан кейін өмірінің түбегейлі өзгергенін айтады. Ол Алла жолына түсуге ұзақ дайындалған, деп хабарлайды Neonomad.kz ақпарат агенттігі Zakon.kz сайтына сілтеме жасап.

«Әлхамдуллиллах, сенім маған бәрін береді. Мен ешқандай да өзіне көңілі толмай депрессияда, күйзелісте жүрген адам емеспін. Мен өзімнің дінге келгенге дейін және келген соң қандай болғанымды білемін. Айырмашылық өте үлкен. Мұсылман болу сондай бақыт!

Ешқандай артық уайым жоқ, келсе — келді, келмесе — келмеді. Жүрегің де, жаның да тыныш. Жауапкершілік сезімі, тәртіп, адалдық — мұның барлығы маған ұнайды. Барлығын нақты орындаймын, табиғатым осы. Мысалы, мені 18:00-ге шақырса, мен 18:00-де сол жерде боламын.

Мектепте сабаққа кешіккеннен немесе қашып кеткеннен екілік баға алу оңай еді. Жоғарғы сыныптарда барлығы дәптер ғана алып барса, мен барлық кітабымды түгелапаратынмын. Оларды күтіп ұстап, қажет кезде өңдейтінмін. Маған әрбір заттың өз орнында жатқаны, тиісті жерде ілініп тұрғаны керек. Мұны көрген досым «Сен тіпті шұлықты да қырын шығарып саласың» деуші еді. Тәртіп, тазалық, қатаңдық — исламға тиесілі және бұл менің де көңілімнен шығады», — деді ол.

Сондай-ақ ол исламға келгеннен кейін еріксіз қарапайымдылыққа ұмтылатыныңды айтады. Бұрынғыдай дүниеқоңыздық пен көрсеқызарлық жоқ.

«Мен ақшаны жақсы тауып, автобуспен жүрмеген едім. Ал қазір автобуспен де жүре аламын. Дәмханада да өзіме өзім қызмет көрсете аламын. Пайғамбарымыз әрбір діннің өз ерекшелігі барын айтып кеткен. Ислам діні қарапайымдылығымен ерекшеленеді», — деді Максим Келлер.

Орыс жігітті дінді қабылдаған соң, өзіне мұсылманша Махмұд есімін лайық деп тапқан. Сондай-ақ, ол ислам дінін қабылдамаса да, әскерде жүргенде сүндетке отырғанын айтады.