Наманган қаласы әкімшілігінің хабарлауынша, баспанасын қорғаған әйел өз-өзін өртеген соң, жерге таласқан ер азаматқа басқа жер бөлінген, деп хабарлайды Neonomad.kz ақпарат агенттігі.
Марқұмның анасы Мухаббат Дедабаева қызының 13 мың долларға сатып алған үйін енді қайырымдылық ретінде қайтарып бергеніне келіспейтінін мәлімдеді. Махалла жиынында қабылданған шешімге сәйкес, мүлікке таласқан Ахадхон Жураев басқа жер алып, өзінің жекеменшігіндегі үйді зекет ретінде марқұмның балаларына беруге келіскен.
Алайда Мухаббат Дедабаева бұл құжатқа қол қоймады. Дедабаевтар отбасының құқығын қорғаушы адвокат Анваржон Исматовтың айтуынша, бұл құжаттың заңдық күші жоқ.
«Заңда үйді зекетке беру деген түсінік жоқ. Мәселені шешу үшін сот жаңа шешім шығаруы тиіс», – деді адвокат.
35 жастағы Гуландом Дедабаева биыл 29 қыркүйекте өз-өзін өртеп жіберді. Кәмелет жасқа толмаған екі баланың анасы ауруханада қайтыс болды. Марқұмның туыстарының айтуынша, екі жыл бұрын ол үйді 13 мың долларға сатып алған. Бірақ аудандық кадастр басқармасы мен жергілікті әкімшілік үйді тіркеуден бас тартқан.
