Ақтөбе облысының Хромтау ауданында атыс болып, бес адам жарақат алды. Зардап шеккендердің біреуінің жағдайы ауыр. Оған аудандық ауруханада екі рет ота жасалған, деп хабарлайды Neonomad.kz ақпарат агенттігі «Астана» арнасына сілтеме жасап.

Атыс түңгі онның шамасында Хромтау ауданында болған. 21-22 жастағы жас жігіттер қару атысып, бес адам жарақат алды. Олардың барлығы дереу Хромтау аудандық ауруханасына жеткізіліпті. Біреуіне дереу ота жасалған.

Қалған төртеуі жедел жәрдеммен облыс орталығына жеткізілді. Біреуі Медицина орталығына, қалған үш адам жедел жәрдем ауруханасында емделуде. Науқастардың кеуде қуысына, ішіне және қолы мен аяғынан оқ тиген. Дәрігерлер олардың жағдайы қалыпты деп отыр.

«Үшеуі де қазір Травмотолгия бөлімшесінде жатыр. Түскен кезде жағдайлары орташа ауырлықта болды. Қазір ем алып жатыр. Екеуі 2-3 күнде үйге шығарылады. Біреуіне операция жасау керек болады. Сол жақ қолының буынына мылтық оғынан жарақат алған операция керек», – деді Ақтөбе қалалық жедел жәрдем ауруханасының бас дәрігері Сәкен Қапанов.

Бұл оқиғаға қатысты жедел іздестіру шаралары жүргізіліп, үш жергілікті тұрғын ұсталған. Күдіктілер қылмысты жасырмақ болыпты. Олар екі 16 калибрлы аңшы мылтығын, Бөгетсай ауылы маңындағы Ор өзендегі көпірдің астына жасырған көрінеді.

«Іздестіру шаралары барысында аталмыш екі шолақ мылтық және ВАЗ 2114  Ресей елінде есепте тұрған автокөлік тәркіленді. Осы дерек бойынша қазіргі таңда ҚР ҚК 99 бабы бойынша қылмыстық іс қозғалып тергеу амалдары жүргізілуде. Күдіктілер қамауға алынды», – деді Ақтөбе облыстық ПД баспасөз қызметінің жетекшісі Ерболат Сарқұлов.

Қазіргі таңда қанды оқиғаның неден туғаны белгісіз. Мылтықтардың иесі де анықталу үстінде. Бірнеше сараптама тағайындалған. Күдіктілердің кінәсі дәлелденсе 7 жылдан 11 жылға дейін бас бостандығынан айырылуы мүмкін.