Қытайда соңғы төрт күнде коронафирус жұқпалы дертінен қаза болғандар саны азайды. Қытай билігінің мәліметі бойынша, соңғы күндері 105 адам осы аурудан көз жұмды. Сенбі күні 140 адам COVID-19 вирусынан қайтыс болғаны мәлімделді, деп хабарлайды Neonomad.kz ақпарат агенттігі.
Дегенмен жұқпалы дерт жұқтыру көрсеткіші 5 пайыз артқан. Олардың дені Хубэй провинциясының Ухань қаласында тұрады. Жұқпалы ауру осы қаладан тараған.
Қытай билігі Хубэй провинциясының тұрғындары үшін карантин жағдайын қатайтқанын хабарлады. 60 миллион адам үйден шықпауы тиіс. Отбасының бір мүшесі үш күнде бір мәрте ғана қажетті заттар алуға көшеге шыға алады. Олардың барлығын тіркеуге алып отырады. Жекеменшік автокөлік пайдалануға да тыйым салынған.
Қытайда барлығы 70 548 адам коронавирус жұқтырған, 1770 адам қаза тапты. Шамамен 11 мың адам жазылып шықты. Қытадан тыс жерде 778 адам ауру жұқтырған, бес адам қайтыс болды.
Қытайдағы Zhejiang Hisun Pharmaceutical компаниясы биліктен вирусқа қарсы «Фавипиравир» (Favipiravir) дәрісін сатуға рұқсат алды деп хабарлады Reuters.
