Қытайда қауіпті вирустан көз жұмғандардың саны 106-ға жетті, деп хабарлайды Neonomad.kz ақпарат агенттігі «Хабар 24» арнасына сілтеме жасап.
Ал дертті жұқтырғандардың қатары 4 мыңнан асты. Бұл туралы шет елдің БАҚ өкілдері Қытайдың мемлекеттік телеарналарына сілтеме жасай отырып хабарлайды. Сонымен қатар, вирус жұқтырған алғашқы адам Шри-Ланка мен Германияда тіркелген. Екі елде де дертке шалдыққандар жуырда Хубэй провинциясынан келген екен. Қазір олар дәрігерлердің жіті бақылауында.
Айта кетейік, бұған дейін вирус жұқтыру дерегі осы елдерден басқа Гонконг, Макао, Тайвань, Таиланд, Жапония, Оңтүстік Корея, АҚШ, Вьетнам, Сингапур, Непал, Франция, Австралия мен Малайзияда да тіргелді. Ал Қытай астанасы Бейжіңде коронавирустан алғашқы адам көз жұмды. 50 жастағы марқұм Ухань қаласында қаңтардың 8-і күні болған екен. Ал 22 күні оған нақты диагноз қойылды.
