Атырауда жаяу жүргіншілер жолында жасөспірімді қаққан жүргізуші көлікпен жарысқан. 21 жастағы көлік иесі Данияр Сәтиев кінәсін толықтай мойындап, оның адвокаты сотқа процесуалды келісімге келу туралы өтініш түсірді. Бүгін сот отырысына шақырылған үш куәгер де келген жоқ. Оның бірі – жарысқа түскен мерседес жүргізушісі. Ол әкімшілік жауапқа тартылды. Бірақ жәбірленуші тарап жарысқа түскен бұл жігіттер де жауапқа тартуды сұрады, деп хабарлайды Neonomad.kz ақпарат агенттігі Астана арнасына сілтеме жасап.
«Міндетті түрде куәгер Мұхамедиов Азаматтан жауап алуы сұраймын. Бұл өте маңызды. Істе біздің, жәбірленуші тараптың, бірнеше өтініші бар. Мұхамедиев Азаматтың да аталған бақытсыз жағдайға қатысы бар», – деді жәбірленуші тарап қорғаушысы Әсел Нұрғазиева.
«Сот қаулы етеді: ҚР Қылмыстық Процесуалды Кодексінің 628 бабына сәйкес, егер сотқа процесуалды келісім туралы өтініш түскен болса, судья оны қанағаттандыру тиіс. Және прокурорға белгілі мерзімді ұсынып, процесуалды келісім жасақтауға жіберу керек. Сондықтан сот қылмыстың істі кейінге қалдырып, адвокаттың процесуалды келесімге келу туралы өтінішін қанағаттандырады», – деді Атырау қалалық №2 сотының судьясы Жұмағали Тәшімов.
Естеріңізге салайық, қайғылы оқиға өткен жылдың 21 қыркүйегінде қаладағы Баймұханов көшесінде болды. Бейнебақылау камерасынан қос қымбат көліктің аса жоғары жылдамдықпен жарыса жүйткігені анық көрінеді. Сараптама қорытындысына сәйкес адам қаққан «Тойота» сағатына 145, ал одан қас-қағым сәт бұрын жасөспірімнің жанынан зу етіп өткен қара «Мерседес» сағатына 137 шақырым жылдамдықпен жүрген. 17 жастағы колледж студенті Нұртаң Мақсотов оқиға орнында қаза тапқан еді.
