Екі жарым жастағы бүлдіршінді комаға түсірген тіс емханасында тексеру аяқталды. Жекеменшік емхананың сертификат мерзімі өтіп кетіпті. Одан басқа да талапқа сай келмейтін тұстары шаш етектен дейді мамандар, деп хабарлайды Neonomad.kz ақпарат агенттігі КТК арнасына сілтеме жасап.
«Тіс емханасының дәрігері мен иесін клиникалық іс-әрекеттерге рұқсат беретін сертификаттың мерзімі өтіп кетуіне байланысты жауапкершілікке тартамыз. Қалған құжаттар құқық қорғау органдарына жіберілді», – деді медициналық қызметтер көрсетуді бақылау жөніндегі бас мемлекеттік инспекторы Лаура Ахметниязова.
Тіс емханасындағы дәрілік заттарды сақтау талаптары бұзылған, яғни арнайы температураны, ылғалдылықты сақтайтын жабдық болмай шыққан. Комиссия емхананың жұмысын тоқтатуды талап ететін құжаттарды сотқа жіберілмек. Оның үстіне 2018 және 2019 жылдары да дәл осы емдеу мекемесі анестезиолог-реанимотологтың жұмыс стандарттары сақталмағаны екі рет анықталыпты. Естеріңізге салсақ, 26 желтоқсанда екі жастан асқан қыз бала елордадағы жеке тіс дәрігеріне ем-домға барып, комаға түскен еді. Балақай әлі есін жимаған.
