Көк Төбедегі аттракциондардың бірінен жасөспірім құлап, алған жарақаттары салдарынан ауруханаға жеткізілді, деп хабарлайды Neonomad.kz тілшісі.
Осы уақытқа дейін әлеуметтік желіде Көк-төбедегі атракционнан бір адамның құлап, аяқ-қолы сынғаны туралы ақпарат тараған болатын. Алматы қалалық полициясы аталған оқиғаны растап, оның 2 қаңтар күні болғанын мәлімдеді.
13 жасар жасөспірімнің ата-анасының ешкімге шағымы жоқ. Полиция мәліметінше, ол өзінің абайсыздығынан құлап кеткен.
«Ол құлап, аяғын сындырып, басымен соғылды. Зиян шеккен адам ауруханаға жатқызылды», – деді полициядағылар.
Алматы денсаулық сақтау басқармасы өкілдерінің мәліметінше, жасөспірім Алматыдағы Балалар шұғыл медициналық көмек орталығына жедел жәрдеммен жеткізілді.
«Дәрігерлер тексерді. Ол барлық қажетті медициналық көмекті толық көлемде алып жатыр. Қазір баланың жағдайы тұрақты», – деп атап өтті басқармадағылар.
