Күйеуімнің кінәсі жоқ! Шамалған бекетінде жол апатына ұшыраған автобус жүргізушісінің жары араша сұрады. Лейла Жарылғасованың сөзінше, сот марқұм күйеуін шойын жол бойындағы қайғылы оқиғаға тікелей кінәлі деп тауып, істі жаппақ, деп хабарлайды Neonomad.kz ақпарат агенттігі КТК арнасына сілтеме жасап.

«Біз өттік, жасыл жанып тұрды. Диспетчер ешқандай шара қолданбады. «Қазақстан темір жолы» осы қойған адамына, қойған адамның жауапкершілігін өз мойына алсын. Мүгедек адамды қойған. Неліктен олар мүгедек адамды мұндай жауапты жұмысқа қойғанын түсіндірсін», – деді марқұм Н. Сорокубаның әйелі Лейла Жарылғасова.

Лейла Жарылғасованың сөзінше, қазір темір жол компаниясының өкілі бүкіл айыпты автобус жүргізушісі Нұрғали Сорокубаға аударып, өзін сүттен ақ, судан таза етіп көрсетпек. Оған қоса ұлттық компания диспетчердің 3-ші топтағы мүгедек екенін жасырып отыр екен. Куәлік етуге келгенде, екі сөздің басын құрай алмағанын көрдім дейді ол. Төрт баламен жесір қалған келіншектің уайымы көбейген. Үлкені биыл мектеп бітірсе, кенжесі 4 жаста. Бірер күн бұрын тергеуші марқұм күйеуіне қатысты істің жабылатынын айтқалы ұйқысынан айырылған. «Қаншама адамның өмірін сақтап қалған кісіні айыптау – күлкілі» деп есептейді жары.

Жығылғанға жұдырық. Қазір Лейла төркінін жағалап жүр. Шамалған бекетіндегі жол апатынан соң күйеуінің туыстары оның өліміне әйелін кінәлап, келіншектен теріс айналыпты. 15 қыркүйекте Шамалған бекетінде қоғамдық көлікті пойыз соғып, 20 метрге дейін сүйреп әкеткен болатын. Үш адам жараланып, автобус жүргізушісі сол жерде жантәсілім етті. Ал тергеу ісіне қатысты көліктегі полиция департаментінің берген жауабы мынандай.

«15 қыркүйекте аталған факті бойынша ҚР Қылмыстық Кодексі 345-бабының 2 тармағы және 344-бабының 2 тармағына сәйкес сотқа дейінгі тезргеу амалдары басталған. Бүгінгі күні сотқа дейінгі тергеп, тексеру амалдары жалғасуда», – деді ҚР IIM Көлiктегi полиция департаментiнiң баспасөз хатшысы Ләззат Қасымжанова.

Ірі жол апатынан соң жергілікті тұрғындар шу шығарғанын жаздық. Олардың сөзінше, осы күнге дейін көп адамның пойыз басып көз жұмғанын айтып шу шығарды. Осы орайда олар көп жылдан бері көпір сұрап келе жатқанын жеткізді.

Сонымен қатар, оқиға орнында болған куәгерлердің сөздерінде жаздық. Олардың айтуынша, жүргізуші есікті ашып, адамдарды шығарған. Сол кезде оның әйелі «Шық!» деп айқайлады. Бірақ ол өзі үшін адамдар маңыздырақ екенін айтты.