Тәжікстанның шекаралық әскер басқармасы 6 қарашаға қараған түні тәжік-өзбек шекарасына қарулы топтың шабуыл жасап, бір милиция қызметкері және бір шекарашы қаза тапқанын мәлімдеді, деп хабарлайды Neonomad.kz ақпарат агенттігі.

«6 қарашаға қараған түні сағат 3:23-те маска киген 20 шақты адамнан құралған қарулы топ «Султанабад» шекаралық отряды бақылауындағы №4 «Ишкибод» шекаралық заставасын атқылап, шабуыл жасады. Шабуыл кезінде олар бес қару-жарақты тартып алды. Күштік құрылымдардың операциясы нәтижесінде қарулы топ қоршауға алынып, 15 мүшесінің көзі жойылды, бесеуі ұсталды» делінген басқарма хабарламасында.

Шекаралық әскер басқармасының баспасөз қызметі шұғыл-тергеу тобы құрылып, тергеу жалғасып жатқанын хабарлады. Олардың айтуынша, қарулы топ мінген төрт көлік те жанып кеткен.

Әскерилер журналистерді оқиға орнына жібермеді. Мемлекеттік ақпарат агенттіктері жариялаған суреттерден өлген адамдардың қара түсті киім кигені көрінеді.

Билік шабуылдаушылар туралы толық дерек таратпады. Қаза тапқан шекарашы мен ішкі істер министрлігінің өкілінің де аты-жөнін әзірге айтпады.