Талдықорғанда алматылық Зинур Хамитовты айуандықпен өлтірген қылмыскерлерге қатысты сот отырысы басталды. 25 жастағы жас жігіт қарызын сұрағаны үшін қаскөйлер өлгенше ұрып тастаған, деп хабарлайды Neonomad.kz. 

Қылмыс жағандар Талғардың тұрғындары. Олардың біреуі қайтыс болған Зинурды жақсы танитын көрінеді. Екеуі бірге жұмыс істепті.

Зинурдың анасының сөзінше, қайғылы оқиға 2018 жылдың 23 тамызында болған. Ұлы өзінің әріптесіне қарызға 100 мың теңге береді. Бірақ ақшаны игілігіне жаратқан әріптесі қарызын қайтаруға асықпапты. Сөйтіп екеуі Алматы маңындағы Бесағаш пен Тұздыбастау поселкелерінің арасында орналасқан айналмалы жолда кездесуге келіседі. Алайда борышкер жалғыз бармайды, қасына достарын шақырған. Ал Зинурды болса «танысымнан ақшаны алу керек» деген сылтаумен адам жоқ жерге шығарады.

«Аблакимов арам пиғылын жүзеге асыру үшін Зинур Хамитовты құр сөзбен алдастырып тұрған. Сол кезде Ахметов (Аблакимовтың досы) көліктен спорттық ағаш битаны алып, Зинурдың желкесінен бір ұрған. Бірақ онысымен тоқтамай, Хамитовты өлгенше соққының астына алған. Жарақаттан оқиға орнында ол көз жұмған»,- делінген айыптау актісінде.

Хамитов жерге құлаған кезде, қылмыстық топ оны аяқпен теуіп, қолмен ұрған. Кейін оның өлі денесін көліктің жүк салғышына жүктеп, өзенге апарып, суға лақтырып жіберген. Мәйіттен құтылған төрт азамат үйлеріне қайтқан. Зинурдың анасының сөзінше, адам өлтірді деп тек екі азамат айыпталып отыр. Сотталушы Тұрсын Аблакимов пен Абликим Ахметов алдын ала сөз байласу арқылы ұйымдасқан топ адам өлтірді деп айыпталуда.

Қылмысқа қатысы бар қалған екеуі алғашында күдікті ретінде қаралса, кейін куәгер деп танылған. Яғни, куәгерлер адамды өлгенше ұрып жатқанда, жай қарап тұрған.

«Қарашада біздің қолымызға тапсырылған айыптау бойынша, төрт қылмыскер «Адам өлтірді» деген 99 бабы бойынша айыпты еді».

Бірақ қылмыстық іс сотқа барғанда екеуі «адам өлтіру» бойынша емес, «қылмысты хабарламағаны» үшін сотталатыны белгілі болды. Кейін не болды? Іс бойынша ешқандай жаңа фактілер келтірілген жоқ. Неліктен «адам өлтіру» бабын «қылмысты хабарламағанға» ауыстырды? Не болды? Бізге беймәлім. Бабын өзгерткені жайлы Бас прокуратураға шағым түсірген болатынмын. Бірақ әзірге жауап алғаным жоқ. Ал сот отырысы болса соңына жетіп қалды»,- дейді еңіреген ана.

Осыған дейін, аса ауыр қылмыс жасады деген күдікпен 1994-1998 жылдары туған төрт азаматтың ұсталғанын полиция хабарлаған болатын.

«Тергеу материалдарында күдіктілердің қылмысты мойындағандары, сонымен қатар заттай айғақтар бар»,- делінген еді Алматы облыстық ІІД баспасөз қызметі таратқан хабарламасында.

Зинурдың анасы ұлын алдын ала келісіп, айуандықпен өлтірген қылмыстық топты жазаға тартқызуды көздеп отыр.